Napigilan ng mga awtoridad ang pag-alis ng tatlong babaeng hinihinalang biktima ng human trafficking sa Ninoy Aquino International Airport (NAIA) matapos matuklasang hindi Vietnam kundi Cambodia ang kanilang tunay na destinasyon.
Ayon sa Bureau of Immigration (BI), hindi nagtugma ang kanilang mga sagot tungkol sa pupuntahang lugar at iba pang detalye ng biyahe. Nakakita rin umano ang mga opisyal ng kahina-hinala at posibleng binagong mga dokumento, kabilang ang mga katibayan sa bangko, trabaho at pagpaparehistro ng negosyo.
Hinala ng mga awtoridad, maaaring inalok ang tatlo ng trabaho sa Cambodia na posibleng may kaugnayan sa mga operasyon ng online scam.
