Nanguna ang United Laboratories (Unilab) sa listahan ng mga kumpanya sa Pilipinas na napabilang sa kauna-unahang ranking ng TIME magazine para sa best employers sa buong Asia-Pacific.
Sa Asia-Pacific Best Employers of 2027, na binuo ng TIME katuwang ang global data firm na Statista sa paglulunsad ng survey ukol sa mga empleyado mula 2024 hanggang 2026, pumuwesto sa No. 24 ang Unilab na sinundan ng diversified conglomerate na Ayala Corp. ng pamilya Zobel sa No. 32.
Nasa No. 44 naman ang Metropolitan Bank & Trust Co. (Metrobank), na sinundan ng San Miguel Corp. sa No. 55 at ng Asian food conglomerate na Jollibee Foods Corp. sa No. 89.
Nasa No. 105 ang Del Monte Philippines, habang ang BDO at ang Philippine Airlines ay nasa No. 164 at No. 186.
Nasa No. 196 ang Aboitiz Power, at ang SM Investments Corp. na pagmamay-ari ng pamilya Sy ay nasa No. 206.
Ayon sa TIME, mahalagang kilalanin ang mga employer na nagtataguyod ng exceptional workplace sa isang rehiyong hinuhubog ng mabilis na pagbabago sa ekonomiya, nagbabagong ekspektasyon ng mga manggagawa, at tumitinding kumpetisyon para sa mahuhusay na talento.
Idinagdag pa nito na ang ranking ay nagsisilbing pamantayan para sa mga kumpanya sa buong rehiyon ng APAC at humihikayat sa mga negosyo na gawing prayoridad ang kapakanan, pag-unlad, at inclusion ng mga empleyado sa kanilang pamamahala.
