Bilang isa sa mga bumuo ng 1987 Constitution, iginiit ni retired Supreme Court Associate Justice Adolfo Azcuna na 16 na boto ang kailangan para mahatulan si Vice President Sara Duterte sa impeachment trial.
Aniya, dapat ibatay ang two-thirds threshold sa lahat ng 24 na miyembro ng Senado, kahit may mga hindi nakadadalo sa paglilitis.
Hindi naman sang-ayon sa kanyang posisyon ang mga dating chief justices na sina Hilario Davide Jr., Reynato Puno at Artemio Panganiban. Ayon sa kanila, dapat nakabatay ang threshold sa bilang ng mga senador na dumadalo sa paglilitis.
Kaugnay nito, nakatakdang pagdesisyunan ng impeachment court ang isyu sa Setyembre 23, matapos ang oral arguments ng depensa at prosekusyon.
📸: Senate
