Inalis na ng Quezon City Regional Trial Court (RTC) Branch 98 ang arrest warrant na inilabas laban kay Vice President Sara Duterte matapos itong personal na humarap sa korte at maghain ng piyansa ngayong Sabado, Setyembre 5, 2026.

Ipinakita ni Atty. Paul Lawrence Lim, isa sa mga legal counsel ng Bise, ang opisyal na lifting order mula sa korte na nagpapatunay na void o nawalan na ng bisa ang warrant of arrest laban sa kaniyang kliyente.

Ayon sa dokumento ng RTC, nagbayad ang Bise ng kabuuang ₱360,000 bilang piyansa—na nagkakahalagang ₱120,000 sa bawat isa sa tatlong count ng kasong grave threats na isinampa laban sa kaniya.

Binigyang-diin ng kampo ng Bise na pormal silang sumunod sa proseso ng batas. Ayon kay Atty. Lim, bagamat may mga legal na katanungan pa rin ang kanilang kampo ukol sa hurisdiksyon ng korte sa isang nakaupong opisyal na may impeachment immunity, pumasok at humarap pa rin si VP Sara upang patunayan na wala itong intensyong takasan ang hustisya.

Matatandaang ipinalabas ng QC RTC Branch 98 ang warrant of arrest noong Biyernes, Setyembre 4, matapos makakita ng probable cause ang korte sa mga paratang na isinampa ng Department of Justice (DOJ) at National Bureau of Investigation (NBI).

Kinondena naman ng PDP-LABAN ang administrasyong Marcos sa diumano'y paggamit ng mga ahensya ng gobyerno para gipitin ang mga nasa lehitimong oposisyon.

Giit ng partido, naglalagay umano ang pamahalaan ng mga opisyal na matapat sa kanila sa mahahalagang posisyon sa gobyerno para gamitin laban sa mga kumokontra sa umano'y korapsyong nagmumula mismo sa Palasyo.

“The blatant attempt to decimate the political Opposition is disingenuous yet obvious: appoint people beholden to the present administration to key positions in government agencies, and use these agencies as weapons of mass harassment against those who dare oppose the prevailing corruption masterminded by the Palace,” pahayag ng partido.

4.2-magnitude earthquake strikes Cebu on Saturday night