Hagupit ng kalikasan

Habang patuloy sa pagtatagisan ng galing ang mga abugado ng Prosekusyon at Depensa, gayundin ng mga Senator-Judges sa Impeachment Trial laban kay Vice President Sara Duterte, patuloy namang nagdurusa ang maraming kababayan natin sa epekto ng magkakasunod na bagyo na pinalakas pa ng Southwest Monsoon o Habagat.

Bagama’t humupa na ang pag-ulan sa ilang lugar sa Luzon, ilang mga lalawigan pa rin ang nakararanas ng mga pag-ulan, nananatili pa rin ang pinsalang iniwan ng halos tatlong linggong sunud-sunod na malalakas na pag-ulan.

Hanggang nitong Setyembre 2, 2026, umabot na sa 9.4 na milyong indibidwal ang naapektuhan ng magkakasabay na mga bagyo at Habagat. Nasa 39 ang pinakahuling tala ng nasawi dahil sa landslide, electrocution at pagkalunod dahil sa pagbaha.

Aabot sa 178 lugar at lalawigan sa bansa, karamihan ay sa Luzon, ang nagdeklara ng state of calamity, ayon sa National Disaster Risk Reduction and Management Council (NDRRMC). Nasa P6.27 billion ang pinsalang idinulot ng kalamidad sa imprastraktura habang aabot sa P2.84 billion naman ang nasira sa mga pananim, pangisdaan at livestock.

Dahil sa matinding epekto ng mga kalamidad, libu-libong mga pamilya ang inilikas sa mga evacuation center.

Sa tuwing tag-ulan, hindi na bagong eksena ang pagbaha. Ang malalakas na pag-ulan at dami ng ibinubuhos na ulan ay pinaniniwalaan ng mga eksperto na epekto na ng climate change.

Pero climate change ang pinakamadaling alibi para pagtakpan ang kapalpakan ng pamahalaan na protektahan ang mga mamamayan laban sa hagupit ng kalikasan.

Aminado ang administrasyon na mayroong flood control master plan ang bansa ngunit hindi ito naipatupad sa ilang taong lumipas. Taun-taon ay nagiging problema ng bansa ang pagbaha, pero ngayon lang pasisimulan ang implementasyon ng proyekto.

Sa laki ng perang inilaan ng bawat administrasyon sa walang katapusang flood control projects, nakalulungkot na pahirap pa rin ang patuloy na nararanasan ng maraming Pilipino.

Hindi naman ito nakapagtataka dahil ang malaking halaga na para sa flood control projects ay napunta sa bulsa ng mga contractors, mga tiwaling opisyal ng Department of Public Works and Highways (DPWH), at mga mambabatas na sa halip maging bantay ng publiko ay nagsamantala pa para maibulsa ang pondo ng gobyerno.

Sa nararanasang hagupit ng mga kalamidad, mistulang kalikasan na ang humihingi ng katarungan. Hindi ba’t napapanahon na para papanagutin din ang mga taong nagsamantala kaya nasadlak ang bansa sa ganitong kalagayan?