QUEZON CITY — Personal na humarap si Vice President Sara Duterte sa Quezon City Hall of Justice ngayong Sabado, Setyembre 5, isang araw matapos maglabas ng warrant of arrest laban sa kanya ang isang korte sa Quezon City kaugnay ng tatlong bilang ng grave threats.
Sa kanyang pagdating, iginiit ng Bise Presidente na hindi siya ligtas at inamin niyang natatakot siya para sa kanyang buhay at sa kanyang mga anak.
“I do not feel safe. Pakiramdam ko papatayin nila ako,” ani Duterte sa mga mamamahayag.
Ayon sa Bise Presidente, mayroon siyang dokumentadong banta at panliligalig mula pa noong 2023. “I have documented threats and harassment since 2023. I fear for my children. I do not feel they are safe if I am with them,” dagdag niya.
Sinabi rin ni Duterte na kahit umalis na siya sa kinaroroonan ng kanyang mga anak upang humarap sa korte, pumunta pa rin doon ang mga pulis.
Naunang dumating sa Hall of Justice ang kanyang mga abogado na sina Atty. Paul Lawrence Lim at Atty. Michael Poa. Hindi muna nagbigay ng detalye ang legal team kung agad na maghahain ng piyansa ang Bise Presidente.
Inilabas ng Quezon City Regional Trial Court Branch 98, sa ilalim ni Judge Maria Angelica de Ramos, ang warrant of arrest noong Biyernes, Setyembre 4. Itinakda ng korte ang piyansa sa P120,000 kada bilang, o kabuuang P360,000, para sa tatlong kaso ng grave threats na isinampa sa ilalim ng Republic Act 10175 o ang Cybercrime Prevention Act of 2012.
Nag-ugat ang kaso sa pahayag ni Duterte sa isang online press briefing noong Nobyembre 2024, kung saan sinabi niyang mayroon siyang inupahan upang patayin sina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez sakaling siya ay mapatay. Inihain ng Department of Justice ang reklamo noong unang bahagi ng Agosto.
Paulit-ulit na iginiit ng Bise Presidente na “maliciously taken out of logical context” ang kanyang mga pahayag, at hindi umano ito banta kundi pagtukoy sa umiiral na panganib sa kanyang buhay.
Naghain ang kampo ni Duterte ng motion to quash sa batayan ng jurisdiction, nangangatwirang mayroong limitadong procedural immunity ang mga impeachable official sa ilalim ng 1987 Konstitusyon. Ginanap ang oral arguments noong Agosto 25. Ayon sa DOJ, ibinasura ng korte ang hiling ng kampo ng Bise Presidente na bawiin ang warrant.
“Inirerespeto naman ng Justice Department ang ruling ng korte kasabay ng pagtiyak sa pagsunod sa rule of law,” pahayag ni DOJ Spokesperson Atty. Polo Martinez.
Sinabi naman ni Department of the Interior and Local Government Secretary Jonvic Remulla na maghahain “ASAP” ng piyansa ang kampo ni Duterte. Kinumpirma ni National Bureau of Investigation Director Melvin Matibag na maaaring mag-proseso ng bail application ang korte kahit Sabado.
Ito ang kauna-unahang pagkakataon sa kasaysayan ng bansa na isang nakaupong Bise Presidente ang sumasailalim sa kriminal na prosekusyon at inisyuhan ng warrant of arrest.
Hiwalay ang kasong kriminal sa nagpapatuloy na impeachment trial ni Duterte sa Senado, bagaman isa sa mga artikulo ng impeachment ang nakabatay sa parehong grave threats allegations.
