Uminit pa ang tensyon sa pagitan ng Estados Unidos at ng International Criminal Court (ICC) matapos magsalita si U.S. Secretary of State Marco Rubio laban sa naturang institusyon.
"We have lunatics and crazies involved in the ICC," ani Rubio sa isang video na ibinahagi sa X account ng Department of State.
Patunay ito na walang plano ang kasalukuyang administrasyon na makipagtulungan sa mga imbestigasyon ng ICC.
Matatandaang nagbanta at nangako si Sec. Rubio na bubuwagin niya ang ICC. Hinimok din niya ang iba pang mga bansa na makiisa sa kampanya ng administrasyong Trump upang labanan ang global institution.
Inakusahan ni Rubio ang ICC na nagpapasimula ng giyera laban sa Estados Unidos, hindi gamit ang mga bala o missile, kundi sa pamamagitan ng puwersa ng tinatawag nilang "international law".
Ayon pa kay Rubio, ang ICC ay pinapatakbo ng isang malakas na network ng mga "leftist non-government organizations, smug globalists," at mga kaaway na "Third World governments" na nagkakaisa sa kanilang galit laban sa Amerika.
Bunsod nito, pinalawak pa ng administrasyong Trump ang mga sanction laban sa mga opisyal ng korte, kabilang na ang pag-target sa mga prosecutor at hukom ng ICC upang tuluyang harangan ang anumang imbestigasyon laban sa mga mamamayan ng U.S. at ng kaalyado nitong Israel.
