Panibagong mabigat na dagdag-gastos ang sasalubong sa mga motorista ngayong Martes, Setyembre 22, kasunod ng ikatlong sunod na linggo ng malakihang pagtaas ng presyo ng petrolyo sa bansa.
Sa Shell at Petron, ₱4.80 kada litro ang itinaas ng gasolina, ₱7.80 sa diesel, at ₱6.40 sa kerosene ngayong Martes.
May karagdagang ₱1 kada litro na taas-presyo sa diesel na nakatakda pang ipatupad ng dalawang kumpanya sa Miyerkules.
Batay naman sa datos ng Department of Energy, aabot ngayong linggo sa ₱4.88 kada litro para sa gasolina, ₱8.82 sa diesel, at ₱6.47 sa kerosene ang kabuuang pagtaas.
Patuloy na nakadepende sa galaw ng pandaigdigang merkado ng langis ang mga susunod na pagbabago sa presyo ng mga produktong petrolyo sa bansa.
