Nagbabala ang Senate impeachment court sa House prosecutors na unahin munang iharap ang opisyal ng Anti-Money Laundering Council (AMLC) at bank officials o records bago iharap si dating Senador Antonio Trillanes IV bilang witness sa impeachment trial ni Vice President Sara Duterte.
Sinabi ni presiding officer Sen. Francis “Chiz” Escudero na hindi muna maglalabas ng subpoena para kay Trillanes, ngunit maaari siyang iharap ng prosecution nang boluntaryo. Ayon kay Escudero, maaaring magsilbing batayan ang testimonya ng AMLC witness bago iharap ang testimonya ni Trillanes.
Kinumpirma naman ni House prosecutor Rep. Terry Ridon na kabilang si Trillanes sa kanilang mga karagdagang saksi para sa Article II, na tumatalakay sa alegasyon ng unexplained wealth laban kay VP Sara.
📸: PNA
