Naghain ang US Department of Labor ng panukalang pagbabago upang higpitan ang Permanent Labor Certification (PERM) program na ginagamit ng mga kompanya para makakuha ng employment-based green card para sa kanilang mga dayuhang empleyado.
Sa ilalim ng panukala, kailangang magsagawa ng mas maraming hakbang ang mga employer upang patunayang hindi maaapektuhan ang oportunidad, sahod at kondisyon sa pagtatrabaho ng mga Amerikano sa pagkuha ng foreign workers.
Palalawakin din ang mga requirement sa mga trabahong dati nang hindi saklaw ng ilang patakaran, kabilang ang professional nurses at mga siyentistang may pambihirang kakayahan.
Iminumungkahi rin na gawing moderno ang recruitment process sa pamamagitan ng paggamit ng electronic job advertisements. Hindi rin maaaring mag-apply ng PERM certification ang mga employer sa loob ng dalawang taon matapos magtanggal ng mga Amerikanong empleyadong may kaparehong trabaho.
Ilalathala ang panukala sa Federal Register at sasailalim sa 60 araw na pampublikong konsultasyon bago ang opisyal na pagpapatupad.



