QUEZON CITY — Kinilala ang Open For Business ng NET25 sa ginanap na kauna-unahang Philippine Television and Cinema Icons 2026 noong Agosto 1 sa Camelot Hotel, Quezon City.
Pinangunahan ni Mr. Richard Hiñola ang awarding ceremony, na nagbigay-pugay sa mga indibidwal, programa, organisasyon, at mga brands na nagpamalas ng kahusayan at natatanging ambag sa kani-kanilang larangan.
Ang parangal ay iginawad bilang pagkilala sa patuloy nitong paghahatid ng mga makabuluhang kuwento at impormasyon tungkol sa negosyo, pamumuhunan, entrepreneurship, at tagumpay ng mga Pilipinong negosyante.
Tinanggap ang nasabing parangal ni Marco Ramos, segment host ng Open For Business, sa ngalan ni NET25 President at Executive Producer Caesar R. Vallejos.
Bukod sa Philippine Television and Cinema Icons, isinagawa rin ang paggawad ng Philippine Faces of Success, Philippine Young Faces of Success, Philippine Pageantry Excellence Award, Philippine Outstanding Brand of the Year, at Gawad Rosa Rosal, na kumikilala sa mga indibidwal, organisasyon, negosyo, at mga brand na nagpakita ng kahusayan, pamumuno, at positibong impluwensya sa kanilang mga industriya.
Kabilang sa mga pinarangalan sa Gawad Rosa Rosal sina Ms. Cecille Bravo ng Intele Builders Corp. at Charina Josol, bilang pagkilala sa kanilang dedikasyon at mahalagang kontribusyon sa kani-kanilang larangan.
Sa pamamagitan ng magkakaibang kategorya ng parangal, layunin ng awarding body na kilalanin ang mga personalidad, organisasyon, at institusyong patuloy na nagbibigay ng inspirasyon at nag-aambag sa pag-unlad ng media, negosyo, pageantry, at iba pang sektor sa bansa.
