Nagpaabot ng pagbati si Vice President Sara Z. Duterte sa Iglesia Ni Cristo (INC) sa pagdiriwang ng kanilang ika-112 anibersaryo ngayong Lunes, Hulyo 27.
Sa opisyal na pahayag mula sa Office of the Vice President (OVP), kinilala ng Pangalawang Pangulo ang mahigit isang siglong ambag ng Iglesia Ni Cristo bilang haligi ng pananampalataya at pagkakaisa sa bansa.
"Sa pamamagitan ng inyong mga programa sa edukasyon, kabuhayan, at mabilis na pagtugon sa mga sakuna, patuloy ninyong ipinapakita ang tunay na kahulugan ng malasakit sa kapwa Pilipino, hindi lamang sa Pilipinas kundi sa iba't ibang panig ng mundo," ayon kay Duterte.
Binigyang-diin din ng Bise Presidente ang mahalagang papel ng disiplina at pamumuno ng INC sa gitna ng mga hamong kinakaharap ng lipunan sa ekonomiya at moralidad. Aniya, ang mga katangiang ito ay patuloy na gumagabay sa mga Pilipino tungo sa katwiran at kapayapaan.
Umapela rin si Duterte na magpatuloy ang INC bilang katuwang ng pamahalaan sa pagpapatibay ng karakter ng mamamayan at sa pagtataguyod ng mas ligtas at maunlad na bansa.
