Kinuwestiyon ng defense team ni Vice President Sara Duterte ang paggamit ng prosecution ng AI-generated images para ipakita ang tinatayang itsura at dami ng ₱125 milyon na confidential funds.
Ayon kay Atty. Michael Poa, maaaring hindi tugma ang AI images sa aktuwal na dami ng perang umano'y ini-withdraw ng isang special disbursing officer ng Office of the Vice President.
Sa impeachment trial nitong Lunes, nagpakita ang prosecution ng larawan ng 1,000 bundle na tig-₱125,000 at apat na duffle bag na sinasabing maaaring maglaman ng ₱125 milyon.
Ipinaliwanag naman ng prosecution na visual representation lamang ang mga larawan dahil wala silang aktuwal na cash na maipapakita sa paglilitis.
