Nahaharap sa krisis ang International Criminal Court (ICC) matapos ang sunod-sunod na pagkalas ng iba't ibang bansa, kasabay pa ng pagdedeklara ng administrasyon ni US President Donald Trump na kikilos ito para tuluyang mabuwag ang korte.
Limang karagdagang bansa ang nagpahayag ng kawalan ng tiwala sa tinatawag nilang "selective justice" ng tribunal na nakabase sa The Hague. Ang malawakang pagkalas na ito ay matapos maglunsad ang administrasyong Trump ng isang agresibo at sistematikong kampanya na naglalayong pilayin ang kapangyarihan ng korte.
Sa kasaysayan ng Rome Statute, ang Burundi ang naging kauna-unahang bansa sa buong mundo na tumalikod sa ICC noong Oktubre 2017 matapos akusahan ang korte ng pagkiling laban sa mga pinunong African. Sinundan ito ng Pilipinas noong Marso 2019 sa ilalim ni dating Pangulong Rodrigo Duterte, na kumalas matapos buksan ng ICC Prosecutor ang preliminary examination ukol sa kampanya laban sa iligal na droga.
Nitong Hulyo 2026 lamang, sumunod sa yapak ng Pilipinas ang mga bansang Chad, Venezuela, at ang tatlong military governments ng Burkina Faso, Mali, at Niger.
Ang pinakamalaking banta sa korte ay nagmumula mismo kay Pangulong Donald Trump at sa kaniyang administrasyon na determinadong buwagin ang tribunal. Noong Pebrero 6, 2025, nilagdaan ni Trump ang Executive Order 14203 na nagpapataw ng mabibigat na financial sanctions at visa restrictions laban sa mga opisyal, hukom, at maging mga NGO na tumutulong sa mga imbestigasyon ng ICC laban sa mga mamamayan ng Amerika at mga kaalyado nito tulad ng Israel. Lalong uminit ang galit ng Washington matapos magpalabas ang ICC ng arrest warrant laban kay Israeli Prime Minister Benjamin Netanyahu at mag-imbestiga sa mga alegasyon ng pang-aabuso ng mga sundalong Amerikano sa Afghanistan at sa mga border patrol agents sa US.
Ipinahayag ni US Secretary of State Marco Rubio na ang ICC ay isang direktang banta sa soberanya ng US dahil sinusubukan nitong litisin ang mga sundalo at opisyal ng mga bansang hindi naman pumirma sa Rome Statute tulad ng Amerika.
"We have lunatics and crazies involved in the ICC that are talking about charging members of the US military, maybe even the president or a future president," ani Rubio.
"We will dismantle the ICC — brick by brick, if necessary," pahayag pa ng Secretary of State.
