Lumulutang ngayon ang anggulong ang rehistradong may-ari ng kontrobersyal na SUV ni MMDA General Manager Nicolas Torre ay ang religious group ni Congressman Benny Abante.
Sa panayam ng isang local news network, sinabi ni Torre na nakarehistro ang kaniyang Toyota Fortuner sa "Metropolitan Bible Baptist Church", na ayon sa website ng religious group, ay itinatag at pinamumunuan ni Congressman Abante.
Wala namang indikasyon sa ibang mga lumabas na ulat na personal na pag-aari ni Abante ang sasakyan.
Ayon kay Torre, nabili niya ang sasakyan sa Facebook Marketplace sa halagang P3.5 milyon.
Isa si MANIBELA Chairman Mar Valbuena sa mga nagtaka na sa dinami-dami ng makakabili ng sasakyan ng religious organization ni Cong. Abante, ay si Torre pa ang makakabili.
"Congressman Benny Abante, sana ipaliwanag niyo, kataka-taka naman sa marketplace, sa lahat ng tao, si Gen. Nic Torre pa ang makakabili. Alam ko tropa-tropa kayo nito e, diba?" pahayag ni Valbuena sa page ng MANIBELA.
May mga netizen na nagtatanong kung may deed of sale o invoice na maipapakita o kung kaliwaan ba ang naging bilihan sa ganito kalaking halaga.
"Sige nga, penge nga ng documentary evidence na sa marketplace na post, tapos binayaran ng P3.5 million pesos? Kasi kung wala, you cannot fault us for wondering what your connection is to Benny Abante and why their former car is with you," tanong naman ng political commentator na si Kiffy Chu.
Ang SUV ni Torre ay naging kontrobersiyal matapos makunang dumaraan sa EDSA busway, madiskubreng may mismatched na plaka, nilagyan ng MMDA-markings at wangwang.
Nasa kustodiya na ng LTO ang sasakyan habang nagpapatuloy ang imbestigasyon. Humingi naman ng tawad sa publiko si Torre at nagbayad ng P14,000 multa.
Gayumpaman, hindi pa siya nagre-resign o sinisibak sa pwesto sa kabila ng malinaw na paglabag sa batas-trapiko habang nanunungkulan sa MMDA.
Taliwas ito sa sinapit ng isang traffic enforcer ng MMDA noong Hulyo na dinismiss dahil sa paglabag sa EDSA busway rules.
