11.5 bilyong shabu, kaninong parcel ito?

Halos dalawang tonelada. Ganyan karami ang shabu na maaaring nakapasok na sa Pilipinas kung hindi lang naharang ng mga awtoridad sa ibang bansa.

Dalawang magkahiwalay na kargamento, parehong patungo umano sa ating bansa. At sa laki ng mga shipment na ito, iisang tanong lang ang dapat sinasagot ngayon ng ating gobyerno:

KANINONG "PARCEL" ITO?

Unang nasabat sa Laos ang 521 kilo ng shabu na isiniksik sa 21 maleta. Ayon sa Malaysian narcotics police, ang kargamentong ito na inihahandang isakay sa isang private Learjet ay patungo sana sa Manila. Bukod sa dalawang piloto, sakay ng jet ang kaisa-isang pasahero na isang Pilipino. Ilang araw na ang lumilipas, pero tahimik pa rin ang DFA para alamin kung sino ang pasaherong ito.

Hindi pa man humuhupa ang balitang ito, naharang naman sa Thailand ang fishing vessel na EAST HARBOUR 1 noong Oktubre 8. Dala nito ang 1,178 kilo ng shabu na idedeliver din umano sa Pilipinas.

Kung pagsasamahin, nasa 1,699 kilo ng shabu ang nasabat sa loob lamang ng isang linggo. Batay sa standard valuation ng Philippine Drug Enforcement Agency na ₱6.8 milyon kada kilo, katumbas ito ng tumataginting na ₱11.5 BILYON.

Malinaw itong indikasyon na buhay na buhay ang bilyon-bilyong pisong industriya ng iligal na droga sa bansa, at kumpiyansa ang international drug syndicates na makakalusot sila sa ating mga pantalan at paliparan.

Sa ganitong sitwasyon, inaasahan nating abalang-abala na sana at hindi na magkanda-ugaga ang national government para mag-imbestiga.

Pero habang isinusulat ang artikulong ito, nakakabingi ang katahimikan ng mga awtoridad.

Kabaligtaran ito ng napakabilis at maingay nilang pag-aksyon sa pagsigaw ng "MAGNANAKAW!" ni Reina Mercedes, Isabela Vice Mayor Harold Respicio sa isang viral video.

Dito mo makikita ang nakababahalang prayoridad ng mga nasa pwesto.

Kung kayang tutukan at gawan ng isyu ang kilos ng isang tao, bakit tila napakabagal sila sa halos 1.7 toneladang kontrabando na papasok na sana sa ating bansa?

Dapat ay may ilang araw nang abala ang DILG, PNP, at PDEA sa pagtukoy kung sino ang mga malalaking isda na sasalubong sa ₱11.5 bilyong shabu na ito.

Ang 1,699 kilo ng shabu ay hindi basta ilang pakete na kasya sa maliit na bag. Nangangailangan ito ng malaking puhunan, pribadong eroplano, barko, at malawak na distribution network. At higit sa lahat, nangangailangan ito ng proteksyon mula sa mga maimpluwensyang tao. Sa madaling salita, kailangan nito ng isang organisadong grupo, o ng isang sindikato.

Ang matagumpay na operasyon sa Laos at Thailand ay simula pa lamang. Hindi sapat na magpasalamat lang tayo dahil naharang ang kontrabando. Ang mas mahalaga ngayon ay matukoy at mahuli ang mga taong nasa likod nito.

Kaya ang pinakamahalagang tanong na itinatanong ngayon ng publiko sa gobyerno:

Kaninong parcel ito?