Pina-contempt ng panel ng House of Representatives si dating Land Transportation Franchising and Regulatory Board (LTFRB) whistleblower na si Jeff Tumbado na nag-akusa kay LTFRB Chairman Teofilo Guadiz III at iba pang opisyal hinggil sa talamak umanong korapsiyon sa ahensiya.

Si Tumbado ay humarap kahapon sa pagdinig ng House Committee on Transportation na pinamumunuan ni 2nd District Antipolo City Rep. Romeo Acop.

Sinabon ng mga Kongresista si Tumbado dahil sa pabagu-bago nitong mga pahayag sa komite na hindi mapanindigan ang kaniyang alegasyon ng korapsyon sa LTFRB.

Si Sagip Partylist Rep. Rodante Marcoleta ang nag-mosyon na ikulong si Tumbado ng 10 araw dahil sa kaniyang hindi magkakatugmang mga pahayag tungkol sa isiniwalat nitong korapsyon sa LTFRB na ‘di naglaon ay kanyang binawi.

Ayon kay Marcoleta, pinaiikot lamang umano ng kasinungalingan ni Tumbado ang mga mambabatas at sinasayang lamang ang kanilang oras na ikinumpara nito sa “The boy who cried wolf “.

Pinuna ni Marcoleta ang sinumpaang salaysay ni Tumbado sa NBI na kaya umano siya bumaligtad ay dahilan sa takot para sa kaniyang buhay at maging ng kaniyang mga mahal sa buhay pero ng muling tanungin ng mga kongresista ay sinabi nitong wala umanong nagbabanta sa kaniyang buhay.