Matapos mag-viral ang pananakit at pagkasa ng baril ng isang dating pulis sa isang siklista, isang video na naman ang lumutang sa social media.

Kita sa video ang umano’y pagtukod ng lalaking naka puting t-shirt sa isang rider sa ilalim ng flyover sa Antonio -Arnaiz, Osmeña Highway noong Agosto 25.

Bumunot ng baril ang lalaking naka puting t-shirt, habang pinipigilan tumayo ang rider.

Ang lalaking naka puting t-shirt umano ay isang aktibong police mula sa Pasay City na kinilalang si Police Staff Sergeant Marson Dolipas habang ang rider ay kinilalang si Angelito Rencio na nagpakilala umanong sundalo.

“Bigla siyang ki-nat ng motor at nung magkaroon siya ng pagkakataon binaba niya ito para tanungin imbes na magpakumbaba itong rider minura pa siya at tangkang bubunot. Mabuti na lang mabilis itong ating police inagaw niya ‘yung baril. Nag-pambuno sila kaya tumumba sila,” pahayag ni Pcol. Froilan R. Uy ng Pasay Police.

Sa pagsisiyasat ng PNP papasok sana sa trabaho si Dolipas subalit na-unsiyame dahil sa nangyari.

Batay pa sa report ng pulisya, dinisarmahan ng pulis si Rencio makaraang makita niya ang baril sa baywang nito.

Iniimbestigahan na rin ng mga awtoridad ang pagkakakilanlan ni Rencio kung isa nga itong miyembro ng Philippine Army. At kung mapatunayan na nagsisinungaling ito ay maaaring kasuhan sa kasong pagsusuot ng uniporme ng Philippine Army at pagsusukbit ng baril.