Arestado sa entrapment operations ng Philippine National Police -Anti Cybercrime Group (PNP-ACG) sa Sampaloc, Maynila ang isang online sexual predator na nambiktima ng menor de edad sa Cavite.

Kinilala ni ACG Cyber Response Unit Chief Police Colonel Jay Guillermo ang suspek na si Denver Estorninos alyas “Marjorie Osmena” sa Facebook, 25, at residente ng General Mariano Alvarez, Cavite.

Base sa reklamo ng mga magulang ng menor de edad na biktima, nagpadala ng message ang suspek noong linggo sa kanilang anak gamit ang Facebook account na “Margorie Osmena” at nakumbinsi ang bata na magpadala ng hubad na larawan at video kapalit ng P8,000 salapi.

Pagkatapos naipadala ang mga larawan, binantaan ng suspek ang biktima na ikakalat sa internet ang mga larawan at video kung hindi makikipagkita ang bata.

Dahil sa eskandalo na nilikha ng maling desisyon, ikinumpisal ng biktima sa mga magulang ang nagawang kasalanan at maagap na inireklamo sa ACG ang kaso ng bata.

Nasa kustodiya na ng ACG ang suspek habang inihahanda ang kasong “grave coercion” at paglabag sa R.A. No. 10175 o “Cybercrime Prevention Act of 2012” at R.A. No. 11930 o “Anti-Online Sexual Abuse or Exploitation of Children (OSAEC) at Anti-Child Sexual Abuse or Exploitation Materials (CSAEM) Act.”