Mananatiling caretaker ng 3rd districts ng Negros Oriental at Palawan si House Speaker at Leyte 1st District Representative Ferdinand Martin Romualdez.

Ito ay matapos na maglabas ng desisyon at suspendihin ng Commission on Elections (Comelec) ang nakatakdang December 9, 2023 special election sa teritoryo ni dismissed at murder accused na si 3rd District Representative Arnolfo Teves, Jr. habang sa Palawan ay ang biglaang pagkamatay ni Representative Edward Hagedorn.

Inaasahan na maglalabas ng desisyon ang Kamara kung sino ang ilalagay ni Romualdez na permanenteng officer-in-charge sa 3rd district ng Negros Oriental dahil posible na ang halalan sa bakanteng posisyon ni Teves ay gaganapin sa midterm election sa 2025.

Sa plenary session ng Kamara kahapon ay nag-mosyon si Zamboanga Sibugay Representative Wilter Palma para maging caretaker ng third Congressional district ng Palawan si Romualdez.

“In the interest of the people of the third district of Palawan, I move to designate Speaker Ferdinand Martin Romualdez as the legislative caretaker of the legislative district of Palawan,” pahayag ni Palma.

Dahil wala namang nagpahayag ng pagtutol sa mga kongresista agad na inaprubahan ito ni House Deputy Speaker at Antipolo City 1st District Representative Roberto “Robbie" Puno.

Matatandaan na bakante ang legislative position sanhi ng pagpanaw ni Congressman Edward Hagedorn noong Oktubre.

Upang maipagpatuloy ang pag-aabot ng kaukulang serbisyo at programa sa mga nasasakupan nito, nagpasya ang House leadership na maglagay ng pansamantalang mamamahala sa bakanteng posisyon ng namayapang Palawan official.

Nauna rito, mula ng sibakin sa pwesto si Teves bunga ng pagkakasangkot sa brutal na pagpaslang kay Negros Oriental Governor Roel Degamo, at siyam na iba pa noong March 4, 2023, si Romualdez ang umaktong caretaker sa Distrito nito.