Nananatiling ‘most competitive” local government unit (LGU) ng bansa ang Quezon City sa highly urbanized cities (HUC) category ng Cities and Municipalities Competitiveness Index ng Department of Trade and Industry (DTI).

Sa ikatlong pagkakataon, nakatanggap ang Quezon City ng most competitive city recognition mula nang maging Hall of Fame awardee ito noong 2020.

Nanguna rin ang Quezon City sa mga HUC para sa pagiging most competitive pagdating sa innovation, infrastructure at resiliency. Pumangalawa ito sa economic dynamism, pagkatapos ng Pasay City.

Nakatanggap din ang Quezon City ng special citation para sa pagiging lungsod na may pinakamaraming intellectual property filing at registrations na umabot sa 6,366, ayon sa Intellectual Property Office of the Philippines.

Sinundan ito ng lungsod ng Maynila na may 5,242 IP filers habang pumangatlo ang Makati na may 3,929.

Personal na tinanggap ni Quezon City Mayor Joy Belmonte ang mga parangal sa DTI’s Philippine Creative Cities and Municipalities Competitiveness Congress sa Manila Hotel noong nakaraang linggo.

“We offer the recognition to all our QCitizens who continue to support and trust the city government, and who pay their taxes and dues religiously. We assure them that every centavo they pay will be properly accounted for, and will be used to finance meaningful projects for their benefit and the growth of our city,” pahayag ni Belmonte.

Kinikilala ng Cities and Municipalities Competitiveness Index ang mga LGU sa limang pangunahing haligi: economic dynamism, government efficiency, infrastructure, resiliency at innovation.

Sumunod sa Quezon City sa HUC category ay ang Pasay, Manila, Iloilo, Muntinlupa, Davao, Cagayan de Oro, Makati, Pasig at Valenzuela.

Ang iba pang nangungunang LGU ay kinabibilangan ng Rizal sa mga lalawigan, Naga sa Camarines Sur, Cainta sa Rizal, first at second class municipalities, Sulop sa Davao del Sur, 3^rd at 4^th class municipalities at Tubod sa Surigao del Norte, 5^th at 6^th class municipalities.