Kinumpirma ng National Capital Region Police Office (NCRPO) na sinipa sa pwesto si Quezon City Police District (QCPD) Director Brig. Gen. Melecio Buslig Jr.

Ayon sa QCPD Public Information Office, ang pagkakatanggal ni Buslig ay base sa liham na may petsa na April 21, 2025 na pirmado ni NCRPO Director Maj. Gen. Anthony Aberin.

Itinalaga bilang QCPD officer-in-charge si Colonel Randy Glenn Silvio, deputy director for administration.

Tumangging magsalita ang QCPD hinggil sa tunay na dahilan sa pagsibak kay Buslig sa pwesto.

Bago ang pagsibak kay Buslig, inamin ng QCPD na nasa restrictive custody na ang tauhan na nag-viral sa social media dahil sa panghaharass at ilegal na pagpasok sa ilang bahay habang lasing.

Ang QCPD cop ay agad inaresto at isasalang sa inquest proceedings dahil sa paglabag sa R.A. 7610 (Special Protection of Children Against Abuse, Exploitation and Discrimination Act – Physical Injury) at Domicile.

Ayon sa QCPD, inatasan na ang pulis na isurender ang service firearm na ginamit sa panghaharass at pagpasok sa mga kabahayan.

Tiniyak ng QCPD na mananagot sa batas ang tauhan kapag napatunayan ang ginawang pang-aabuso sa likod ng insidente na nakatakdang sampahan ng kasong administratibo at kriminal.

Iginiit ng QCPD na kinokondena nito ang pangyayari at walang puwang sa hanay ng Philippine National Police (PNP) ang mga umaabuso sa kanilang kapangyarihan.

“We understand the gravity of the allegations and the trauma this has caused to the victims and the community. That is why we are treating this case with the utmost seriousness it deserves,” pagtiyak ng QCPD.

Ambassador Lacanilao, boluntaryong sumuko sa Senado

Kusang sumuko sa Senado si Special Envoy on Transnational Crime Ambassador Markus Lacanilao matapos maglabas ng arrest order si Senate President Francis "Chiz" Escudero.

Ipinadala kay Lacanilao ang kopya ng arrest order. Nagtungo kay Senate Secretary Renato Bantug ang abogado ng ambassador para kumpirmahin ang naturang order.

Matapos makumpirma, boluntaryong nagtungo sa Senado si Lacanilao at prinisinta ang sarili bilang pagtalima sa arrest order.

Sumailalim ang ambassador sa standard procedure at sinuri ng medical at dental bureau ng Senado.

Mananatili sa Senado si Lacanilao sa loob ng hindi hihigit sa dalawang araw.

Matatandaan na ipina-contempt ng Senate Committee on Foreign Relations si Lacanilao sa pagdinig noong April 10 dahil sa pagsisinungaling at pag-iwas sa tanong ng mga senador.

Bilang pagsunod sa due process, inisyuhan muna si Lacanilao ng show cause order ni Escudero para magpaliwanag kung bakit hindi dapat ma-contempt, maaresto at makulong.

Nabigo si Lacanilao na makapagpaliwanag kaya isinailalim sa kustodiya ng Senado at inatasan na dumalo sa susunod na pagdinig kaugnay sa legalidad ng pag-aresto kay dating Pangulo Rodrigo Duterte.

Ito ay upang makasagot ang ambassador ng makatotohanan sa lahat ng tanong ng mga senador na miyembro ng Senate Committee on Foreign Relations na pinamumunuan ni Senator Imee Marcos.