Pinaalalahanan ni Pangulong Ferdinand Marcos Jr. ang publiko na mag-ingat sa Bagyong "Julian."

Sa kanyang talumpati sa distribusyon ng kondonasyon at pagpapalabas ng mortgage sa Paniqui, Tarlac, tiniyak ni Pangulong Marcos ang kahandaan ng gobyerno na tulungan ang mga residente na maaapektuhan ng bagyo.

“Mag-ingat po tayong lahat. Atin pong ituloy ang binabantayan na Bagyong Julian, at handang magbigay ang pamahalaan ng tulong sa ating mga kababayang nangangailangan,” sinabi ng Pangulong Marcos.

Ayon sa PAGASA, ang Tropical Cyclone Wind Signal (TCWS) No. 4 ay nananatiling nakataas sa Batanes at hilagang bahagi ng Babuyan Islands habang mabagal ang naging pagkilos ng Bagyong "Julian" nang dumaan malapit sa Sabtang Island noong Lunes.

Sa 11 a.m. Bulletin ng PAGASA, isinailalim ang mga sumusunod na lugar sa Luzon sa TCWS No. 4: Batanes, hilagang bahagi ng Babuyan Islands (Babuyan Is., Calayan Is.). Nakataas ang TCWS No. 3 sa natitirang bahagi ng Babuyan Islands at hilagang-silangan na bahagi ng mainland Cagayan (Santa Ana).

Isinailalim naman sa TCWS No. 2 ang mga sumusunod na lugar: natitirang bahagi ng mainland Cagayan, Apayao, Abra, Kalinga, Ilocos Norte, hilagang bahagi at gitnang bahagi ng Ilocos Sur (Sinait, Cabugao).

Nakataas ang TCWS No. 1 sa natitirang bahagi ng Ilocos Sur, La Union, Pangasinan, Ifugao, Mountain Province, Benguet, Isabela, Nueva Vizcaya, Quirino, Aurora, hilaga at silangang bahagi ng Nueva Ecija (Cuyapo, Rizal, Laur, Pantabangan, Science City of Muñoz, Gabaldon, Carranglan, San Jose City, Lupao, Talugtug, Bongabon, Llanera, Talavera, Palayan City, General Mamerto Natividad), at Polillo Islands.

Ayon sa PAGASA, maaaring umabot si Julian sa super typhoon category sa tanghali o gabi ng Lunes.