Iniulat ng Department of Agriculrure (DA) na tumaas ang presyo ng mga bilihin, lalo na ng bigas at gulay sa mga pamilihan sa bansa.

Sinabi ni DA spokesman Rex Estoperez, ito ay batay sa ginawang price monitoring ng ahensiya sa ibat -ibang pamilihan sa bansa sa panahon ng kalamidad.

Tumaas umano ng P1.50 hanggang P2 sa kada kilo ng bigas, gayundin ng mga panindang gulay.

Hinikayat naman ng DA ang mga negosyante na huwag samantalahin ang sitwasyon lalo na ngayong may kalamidad.

"Ang iba naman, tubo siyempre ang objective. Pakiusap lang naman namin sana sa kanila, kung ano lang nararapat na presyo ‘yun lang sana” sabi ni Estoperez.

Idinagdag pa ni Estoperez na magagawa ng National Food Authority (NFA) na ma- estabilize ang presyo ng bigas kung may sapat na supply pero sa ngayon ang NFA inventory ay nananatiling mababa dulot ng pagkabigo na mabili ang bigas ng mga magsasaka dahil sa mababang presyo ang alok ng gobyerno.

Samantala, may P2 bilyong halaga na ng agrikultura ang winasak ng bagyong Egay at nasa 123,000 na magsasaka at mangingisda ang naapektuhan ng naturang bagyo mula sa Cordillera Administrative Region, Ilocos Region, Cagayan Valley, Central Luzon, CALABARZON, MIMAROPA, Western Visayas, SOCCSKSARGEN, at Caraga.