Isinusulong sa Kongreso ni Santa Rosa City Representative Danilo Fernandez na hatiin sa tatlo ang prangkisa ng Manila Electric Company (Meralco).

Sa panayam ng Sa Ganang Mamamayan sa Kongresista, sinabi nito na hindi napagsilbihan ng kumpanya ang mga customer nito habang sinisingil naman nang sobra-sobra sa loob ng halos isang dekada.

Masyado na aniyang dominante ang kumpanya sa power industry at napapanahon nang hatiin ang prangkisa nito sa tatlo.

Suhestiyon ng Kongresista, hatiin ang prangkisa para sa National Capital Region, Calabarzon, at Pampanga at Bulacan.

Ipinunto ng mambabatas na kontrolado na ng Meralco ang 70% ng electricity output sa buong Luzon kung kaya't nagagawa na nitong manipulahin ang operasyon ng mga power producer at seller.

Sinabi rin ni Fernandez na dapat isauli ng Meralco ang sobrang nasingil nito mula sa 7.6-million na customer nito sa Luzon.

Nanawagan ito sa Kongreso na ayusin ang pagkakamali sa dating prangkisa ng Meralco.

Sa ilalim ng Republic Act 9202, matatapos ang prangkisa ng Meralco sa April 2028.