Inihayag ni Pangulong Ferdinand Marcos Jr. sa kanyang ikatlong State of the Nation Address (SONA) na naglaan ang gobyerno ng pondo para sa umento sa sahod ng mga kawani ng gobyerno.

"Para naman sa ating mga kawani ng gobyerno, mayroon silang maaasahang medical allowance bilang karagdagang benepisyo sa susunod na taon,'' pahayag ni Marcos sa kanyang SONA sa Batasang Pambansa sa Quezon City noong Lunes.

"At hindi lamang iyon. Mayroon ding napipintong umento sa sweldo na makukuha nila sa apat na tranches. Naglaan na tayo ng pondo para rito simula sa taong ito at sa mga susunod na taon,'' dagdag na pahayag ng Pangulo.

Iniulat ni Pangulong Marcos na pinalawig ng kanyang administrasyon ang serbisyo ng mga job order at contract of service personnel na nagtatrabaho sa gobyerno.

''This will also afford them ample opportunity to work on their civil service eligibility, while gaining additional relevant experience and training to upgrade their employment qualifications,'' ayon kay Marcos.

Una rito, sinabi ng Department of Budget and Management (DBM) na nakatakda nang isapinal ang pag-aaral sa posibleng umento sa sahod ng mga empleyado sa gobyerno sa pagtatapos ng Hunyo ngayong taon.

Ayon sa DBM, tutuklasin ng Compensation and Benefits Study ang iba’t ibang mga aspeto ng kasalukuyang compensation system, kabilang ang mga sahod, mga benepisyo at allowances para matukoy ang mga dapat pang paghusayin.

Ang magiging resulta din ng pag-aaral ay magiging basehan para gawin ang kinakailangang mga pagbabago sa Total Compensation Framework ng civilian government personnel para matiyak ang patas at napapanahong salary adjustment para sa mga empleyado ng gobyerno.

Kapag natapos na ang pag-aaral, ipresenta ang mga resulta sa DBM at sa Governance Commission for Government-Owned or -Controlled Corporations (GCG).