Umabot na sa P6.94 bilion ang naitalang pinsala dahil sa epekto ng bagyong Egay at habagat sa mga imprastraktura sa bansa.

Ayon sa Department of Public Works and Highways (DPWH), pinakamalaking pinsala ay naitala sa flood-control structures na umabot sa P5.6 bilyon, P1.17 bilyon sa mga kalsada habang P162.6 milyon naman sa mga tulay.

Sa pinakahuling update ng DPWH, umabot na lang sa 16 kalsada ang nananatiling sarado sa mga motorista.

Sa Cordillera Administrative Region, siyam pa ang nananatiling hindi passable sa mga motorista dahil sa nagcollapse na lupa, nagtumbahang puno, naputol na kalsada at na-washed out na bridge approach.

Kabilang sa mga apektado ay sa Abra, Apayao, Mt. Province, Kalinga at Ifugao.

Sa Region 1 naman ay may apat na kalsada pa ang sarado dahil sa soil erosion sa bahagi ng pundasyon ng lang tulay at mga malalaking puno na nanganganib matumba.

Kabilang sa apektado ay ang probinsya ng Ilocos Sur, at Pangasinan.

Sa Region 3 naman ay may tatlong kalsada sa Pampanga, ang hindi pa rin passable dahil sa nagcollapse na lupa, natumbang puno, washed-out bridge approach, soil erosion sa bahagi ng pundasyon ng tulay, at mga pagbaha.

Habang may 11 kalsada naman sa CAR, Regions 1, 3 at 6 ang may limited access sa mga motorista dahil naman sa nagcollapse na lupa, road slip, rockslide, landslide at baha.