Ibinasura ng Malacañang ang akusasyon ni dating Pangulong Rodrigo Duterte na may kinalaman si Pangulong Ferdinand Marcos Jr. sa pagbebenta ng Bangko Sentral ng Pilipinas (BSP) ng gold reserves.

Inilarawan ni Presidential Communications Office (PCO) Undersecretary Claire Castro ang mga pahayag ni dating Pangulong Duterte bilang “campaign joke.”

Binigyang-diin ni Castro na ang pagbebenta ng gold reserves ng bansa, na bahagi ng Gross International Reserves (GIR), ay isang regular activity ng BSP upang makatulong na pasiglahin ang ekonomiya.

“Sinabi nga dito ang pagbebenta ng gold, kung mataas ang dapat ibenta,” paliwanag ni Castro sa press briefing sa Malakanyang.

Ayon kay Castro, sineseryoso ng gobyerno ang mga maling pahayag, at kokontrahin ang mga ito ng tamang impormasyon.

“We will take this seriously para naman hindi magkaroon ng fake news lalo na sa mga taong nakikinig sa kanya, at maaaring naniniwala,” dagdag na pahayag ng opisyal.

Nilinaw ng BSP na ang GRI ng bansa ay hawak at pinamamahalaan lamang ng Bangko Sentral para sa foreign exchange requirements ng Pilipinas. Ang proceeds ng anumang sales ay nananatili sa loob ng GRI.

Tiniyak din ng BSP na pananatilihin nito ang bahagi ng reserves sa ginto para mapangalagaan “against offset, movements in the market price of other assets.”