Nangako si Pangulong Ferdinand Marcos Jr. na aangat ang buhay ng mga Pilipinong magsasaka dahil gumagana na ang whole-of-government approach upang masiguro na ang pagsasaka ay hindi na magiging "most difficult job" sa Pilipinas.

Ginawa ng Pangulo ang pangako sa kanyang talumpati sa pamamahagi ng electronic land titles sa mahigit 2,500 agrarian reform beneficiaries (ARBs) sa Davao City.

Sinabi ni Marcos na masakit sa kanya na makita ang mga magsasaka, na nagbibigay ng pagkain para sa mamamayang Pilipino, subalit nananatiling "pinakamahirap" sa Pilipinas.

“Kaya naman, mahirap ko mang makita, nadudurog po ang puso ko na makita na hanggang ngayon, ang pinakamahirap sa ating bansa ay ang mga magsasaka. Kayo ang nagpapakain sa amin, hindi ninyo mapakain ang pamilya ninyo. ‘Yung nag papakain, ‘yung nagbubuhay sa buong Pilipinas sa lahat ng mga Pilipino,” sinabi ng Pangulo sa ARBs.

“Ngunit, ang tulong na nanggagaling sa ating pamahalaan, nanggagaling sa ating lipunan ay napakaliit naman kaya’t ito’y papalitan natin. At hindi na tayo papayag na ang pinakamahirap na hanapbuhay ay ang magsasaka,” pagtiyak ni Marcos.

“Mahirap naman talaga, kahit anong gawin natin mahirap ang magsaka. Kaya’t kailangan ng tulong ng ating mga magsasaka--- ang lahat ng tulong na maibigay ng pamahalaan, at ang pribadong sektor kasama rin d’yan--- lahat ng tulong na mabibigay ay ibibigay naming para naman masabi natin maganda ang maging hanapbuhay ng ating mga magsasaka," dagdag ng Pangulo.

Dahil dito, tiniyak ng Pangulo na matatanggap ng mga magsasaka ang lahat ng tulong na kailangan ng mga ito mula sa gobyerno.

“Kaya naman, pag upo ko bilang Pangulo, ipinaalam ko sa bayan, sa aking unang SONA, na ipagpapatuloy ko at higit na pagbubutihin ang tunay na repormang agraryo na sinimulan ng aking ama,” ayon kay Marcos, na tinutukoy ang Presidential Decree No. 27 ng kanyang namayapang ama na si dating Pangulong Ferdinand R. Marcos Sr.

Nilagdaan ni Pangulong Marcos ang New Agrarian Emancipation Act, na pakikinabangan ng 610,054 Pilipinong magsasaka na nagbubungkal ng mahigit 1.7 million hectares ng agrarian reform lands, dahilan para maging debt-free ang mga ito mula sa P57.65-billion na agrarian arrears.

Bukod dito, binigyang-diin ng Pangulo na nagbibigay ang gobyerno ng iba pang tulong kabilang ang "free seedlings, fertilizers at iba pang agricultural equipment at pagpapatayo ng mas maraming agricultural infrastructures.

“Para hindi kayo nahihirapan na dalhin ang inyong ani mula sa pinagsasakahan ninyo hanggang doon sa palengke, para mababa pati ang presyo, mas malaki ang kikitain ng ating magsasaka. Kaya’t inaanyayahan ko po kayong lahat na magtulungan sa pagtataguyod ng kapakanan ng ating mga magsasaka,” ayon kay Marcos.

Bago matapos ang kanyang talumpati, nanawagan ang Pangulo sa mamamayang Pilipino na tumulong sa pamahalaan sa pagpapaabot ng tulong sa mga magsasakang Pilipino.