Nangako si Pangulong Ferdinand Marcos Jr. ng hindi matatawarang commitment sa Special Forces Regiment Airborne (SFRA) operations ng Philippine Army.

Sa kaniyang talumpati sa 61st Founding Anniversary ng Special Forces sa Fort Magsaysay sa Nueva Ecija, sinabi ng Pangulo na mahalaga ang papel ng unconventional warfare strategy ng nasabing unit sa harap ng masalimuot na mga bantang kinakaharap ng bansa sa ngayon.

“You have exemplified self-sacrifice and resilience, going beyond the call of duty to safeguard communities towards the attainment of internal security and the peace of the republic. I think it would be safe to say that you have lived up to your name as the silent professionals,” pahayag ng Pangulo.

Partikular na tinukoy ni Pangulong Marcos Jr. ang suporta sa pagpapalakas sa kapabilidad ng grupo at pangalagaan ang kapakanan nila at ng kanilang pamilya.

Hinikayat din ng Pangulo ang SFRA na patuloy na tumulong sa mga kapwa Pilipino sa pamamagitan ng suporta sa panahon ng krisis, tiyakin ang kanilang kaligtasan sa panahon ng operasyon at itaguyod ang morale ng Pilipino na kanilang pinagsisilbihan.

Pinuri din niya ang mga ito sa naging papel ng grupo para iligtas ang 360 pasahero at tripulante na sakay ng MV Lady Mary Joy 3 na nasunog sa karagatan ng Basilan noong Marso.

Bukod sa pagsaksi sa capability demonstration ng SFRA, pinangunahan din ng Pangulo ang paggagawad ng pagkilala sa outstanding members ng unit.

Si Pangulong Marcos Jr. ay minsan ding nag-training sa SFRA at kwalipikado bilang Special Forces operator.

Itinatag ang SFRA ni dating Pangulong Fidel V. Ramos noong 1962, na siya rin ang naging kapitan, ay isang elite army unit na sinanay sa counter-insurgency at counter-terrorism, gayundin sa community relations at iba pang unconventional warfare operations.

Ang SFRA ang naging unang operational special forces unit na may airborne capability sa Pilipinas.