Pinangunahan ni Pangulong Ferdinand Marcos Jr. ang pamamahagi ng Certificates of Land Ownership Awards (CLOAs) at land titles sa 4,000 magsasaka sa Central Visayas.

Sa kanyang talumpati sa CLOA at land title distribution sa Dumaguete City, Negros Oriental, sinabi ni Pangulong Marcos na 3,855 CLOAs at titulo ng lupa na sumasaklaw sa 2,867 ektarya ng lupa ang ipinamahagi sa mga magsasaka sa Region 7.

“Alam naman po namin na marami po sa inyo ay matagal nang nangangarap at nagsisikap upang magkaroon ng sariling lupa para sa inyong hanapbuhay. Eto na po at tinutupad po natin ang pangarap ninyo,” sinabi ni Marcos.

“Ito po ay simbolo ng taos-pusong pasasalamat ng sambayanang Pilipino para sa inyong walang sawang pagsisikap at katatagan sa pagsasaka sa ilalim ng init ng araw, sa gitna ng masamang panahon, at sa harap ng maraming pagsubok,” dagdag na pahayag ng Pangulo.

Sinabi ng Pangulo na ang pamamahagi ng CLOAs at mga land title ay nagpapakita ng paninindigan ng administrasyon na palakasin ang mga karapatan ng mga magsasaka at protektahan ang kanilang kapakanan gaya ng nakasaad sa ilalim ng Republic Act 11953, o ang New Agrarian Emancipation Act.

Ayon kay Marcos, ang New Agrarian Emancipation Act ay naglalayong palayain ang Agrarian Reform Beneficiaries (ARBs) mula sa kanilang mga utang.

Sa Region 7, sinabi ng Pangulo na nakapagbigay na ang Department of Agrarian Reform (DAR) ng 4,614 ektarya ng lupa ngayong taon.

Naipamahagi na ng DAR ang kabuuang 15,163 ektarya ng lupa sa 9,549 ARBs sa buong bansa. Ang bilang ay higit sa 65% ng taunang target na 23,216 ektarya ng lupa na ipapamahagi ngayong taon.

Sinabi ng Pangulo na marami pa ring lupang sakahan ang ipamamahagi sa Central Visayas at sa buong bansa.

“Ito ay patunay ng ating patuloy at walang humpay na pagsisikap na tuparin ang aming pangako na kukumpletuhin namin ang repormang agrarian dito sa ating minamahal na Pilipinas,” sinabi ng Pangulo sa libo-libong ARBs.

Bukod sa pamamahagi ng CLOAs at titulo ng lupa, namahagi rin ang Pangulo ng P17.5 million na agrarian equipment sa 3,268 benepisyaryo sa Central Visayas.

“Ang mekanisasyon, ang pagbibigay ng ating mga gamit, itong mga traktor, itong mga processing, dryer [at] kung anu-ano pang mga kailangan ng ating mga magsasaka. Ito ay makabagong irigasyon at patuloy pa rin [ang] pagpapalawak ng irigasyon. Ang mga ito ay susi sa pagpapa-unlad ng ating mga sakahan. Mas mapabilis po itong inyong mga gawain at mas mapapaunlad nito ang lupang inyong sinasaka,” ayon kay Marcos.