Bawal na ang wang-wang at blinkers.

Naglabas si Pangulong Ferdinand Marcos Jr. ng Administrative Order No. 18 na nagbabawal sa mga opisyal at tauhan ng gobyerno na gumamit ng wang-wang, blinkers, at iba pang katulad na gadgets.

Sinabi ng Pangulo na laganap ang hindi awtorisado at walang pinipiling paggamit ng wang-wang at iba pang katulad ng pagsi-signal at flashing devices, na dahilan ng matinding gambala sa trapiko, hindi ligtas na lansangan at traffic environments.

“All government officials and personnel are hereby prohibited from utilizing sirens, blinkers and other similar gadgets that produce exceptionally loud or startling sound, including dome lights, blinkers, or other similar signaling or flashing devices,” nakasaad sa AO 18.

Ang Armed Forces of the Philippines (AFP), National Bureau of Investigation (NBI), Philippine National Police (PNP), fire trucks, hospital ambulances, at iba pang emergency vehicles ay hindi saklaw ng AO.

“In this light, all government officials and personnel are hereby reminded that use of sirens, dome lights, blinkers and other similar devices shall only be under exigent or emergency circumstances or situations or to ensure the expedient and safe passage of emergency responders,” ayon sa AO.

Ang Department of Transportation (DOTr), kasama ang iba pang government agencies, ay inatasan na rebisahin, i-regulate at i-evaluate at i-update ang umiiral na polisiya at patakaran upang matiyak ang epektibong implementasyon ng AO 18, na nakabatay sa umiiral na batas at rules and regulations.

Ang AO ay nilagdaan ni Executive Secretary Lucas Bersamin noong Marso 25, 2024 at magiging epektibo sa oras na nailathala sa Official Gazette, o pahayagan na may general circulation.