Bawal gumamit ang mga pulis ng cellular phones kapag nasa actual duty at nagsasagawa ng patrolya.

Unang utos ito newly-installed Philippine National Police (PNP) Chief Police General Rommel Francisco Marbil na ibinaba sa mga opisyal sa kauna-unahang command conference, isang araw pagkatapos maluklok sa pwesto.

“Ito 'yung ginagawa namin sa Region 8 and this is my first and last warning: No cellphone during duties and patrols. Kapag nahuli ka namin with cellphone, there will be no forgiveness. Very strict kami diyan,” babala ni Marbil.

Maliban sa cellphone, nais ni Marbil na pagbutihin at simulan ng mga pulis ang serbisyo publiko sa madaling araw at bawasan ang oras sa flag-raising ceremonies at parada.

“Number 1 talaga is always public service. Early in the morning, we don't spend so much time doon mga parada at flag raising. Before 8 o'clock, dapat we are ready to accept all our clients,” bilin ni Marbil sa mga matataas na opisyal ng PNP.

“Doon tayo nagugustuhan ng tao. Kung mas maaga and lahat ng problema nila naso-solve natin as early as possible. And I think it is the best way for the PNP to move,” pahayag ni Marbil.

Nilinaw ni Marbil na ang paghihigpit sa paggamit ng cellphone ay ang pag-scroll sa Facebook, pakikipag-chat sa messenger at panonood ng videos habang walang ginagawa o nakatambay kahit nasa oras ng trabaho.

Si Marbil ay iniluklok ni Pangulong Ferdinand Marcos Jr. bilang bagong PNP Chief kahapon, April 1, bilang kapalit ni retired General Benjamin Acorda Jr. kung saan opisyal na nagtapos ang term extension nito noong March 31, 2024.