Natagpuan ng Bureau of Customs (BOC) ang tinatayang kabuuang P519 million na halaga ng agricultural products sa ilang bodega sa Bulacan.

Pinangunahan ni BOC Commissioner Bienvenido Rubio ang nasabing inspeksiyon kasama si House Speaker Martin Romualdez. Nakita nito ang 154,000 sakong imported na bigas at 60,000 na sako ng “palay” sa apat na warehouse na matatagpuan sa Brgy. Wakas sa Bocaue at Brgy. San Juan sa bayan ng Balagtas.

Ang mga imported na bigas ay mula sa Vietnam at Pakistan at may tinatayang halaga na P431 million, habang ang sako ng palay ay nagkakahalaga ng P88 million.

Kapansin-pansin na matagal na rin itong nakatago sa bodega dahil sa inaagiw na.

Ayon kay House Speaker Romualdez, dapat na itong ibaba sa merkado dahil kung hindi ay ma-i-ko-konsidera na itong hoarding.

Pero, nanindigan naman si Alma Esteban, Chief Operating Officer ng Mutya Rice Mill na ilang linggo pa lang nakaimbak ang kanilang bigas dahil kararating lang nito mula Vietnam.

Aniya, regular din silang nagpapalabas ng bigas sa merkado at ibang mga pamilihan.

Pansamantala namang kinandado ng BOC ang apat na warehouse sa Bulacan.

Bibigyan lamang ng 15 araw ang mga may-ari ng warehouse para makapagsumite ng dokumento na patunay na legal ang kanilang pag-iimbak ng bigas.

Sa oras na mabigo ang mga ito, patong-patong na kaso ang kahaharapin dahil sa hoarding at smuggling.