Kinumpiska ng mga kawani ng Food and Drugs Administration (FDA) at Southern Police District (SPD) ang nasa P3.5 milyon halaga ng hindi rehistradong canned goods at nasakote ang may-ari at mga empleyado ng warehouse na sinalakay sa bisa ng search warrant sa Taguig City.

Nakilala ang mga dinakip na sina alyas Angelica, 29, may-ari; Kristine, 44, cashier/secretary; Mhar, 33, warehouseman; at alias Joey, 41, warehouseman.

Nasamsam ng mga pulis sa raid sa loob ng warehouse ang 1,355 kahon ng hindi rehistradong luncheon meat na nagkakahalaga ng P3.25 milyon pati na ang marked money at sales receipts.

Dala ang search warrant na inisyu ni Presiding Judge Mariam Bien ng Taguig City Regional Trial Court Branch 153, isinagawa ng mga pulis ang operasyon sa warehouse sa loob ng Veterans Center sa Taguig.

Ang pagsisilbi ng search warrant ay isinagawa ng SPD-Special Operations Group kasama ang District Intelligence Division, National Intelligence Support Group (NISG) National Capital Region at Taguig Police Substation 2.

Kabilang din sa raiding team ang mga kinatawan ng Food and Drug Administration (FDA) Field Regulatory Operations Office at Regulatory Enforcement Unit.

Tinarget ng mga operatiba ang ilegal na pagbebenta ng mga hindi rehistradong pagkain o produkto partikular ang luncheon meat.