Tinitingnan ng Manila Disaster Risk Reduction and Management Office (MDRRMO na dahil sa bigat ng mga nakasabit na kable ang posibleng sanhi ng pagbagsak ng pitong poste ng Manila Electric Cooperative (Meralco) na ikinasugat ng 3 indibidwal at pagkasira ng 8 nakaparadang sasakyan sa Binondo, Manila.

Ayon kay Arnel Angeles, hepe ng Manila DRRMO, nagpapatuloy pa ang imbestigasyon subalit base sa inisyal na nakita, sobrang bigat ng mga kawad/kable na nakasabit sa mga poste.

Dahil sa insidente, inatasan ni Department of the Interior and Local Government (DILG) Secretary Benjamin Abalos Jr. ang Bureau of Fire Protection (BFP) na magsagawa ng hiwalay na imbestigasyon.

“The DILG instructed BFP Chief Louie Puracan to immediately probe the incident... where several electric posts collapsed, hurting three individuals and damaging eight parked vehicles,” pahayag ni Abalos.

Kaugnay nito, nanawagan si Abalos sa lahat ng local government units (LGUs) na inspeksyunin ang mga electric posts, construction sites, billboards, at iba pang kahalintulad na instalasyon na maaaring bumigay kapag malakas ang buhos ng ulan.

“A memorandum circular will be issued regarding the matter to ensure compliance and prompt action,” ayon kay Abalos.

Ayon naman kay Joe Zaldarriaga, spokesperson ng Meralco, napalitan na kagabi ang lahat ng poste na bumagsak sa Binondo.

Nakumpleto na rin ang restoration works ngayong umaga at naibalik na ang serbisyo ng kuryente sa customers na naapektuhan ng service interruption.

Muli naman humingi ng pang-unawa at pasensya ang Meralco sa abalang idinulot ng insidente.

Sa kasalukuyan, bukas na muli sa mga motorista ang Quintin Paredes St. at Juan Luna St. na pansamantalang isinara bunsod ng sakuna.