Nanawagan si Pangulong Ferdinand Marcos Jr. sa Kongreso na tiyakin ang napapanahong pagpasa sa panukalang 2025 National Expenditure Program (NEP).

Ginawa ni Pangulong Marcos ang panawagan sa kanyang ikatlong State of the Nation Address (SONA) sa Batasang Pambansa sa Quezon City noong Lunes.

"We look to the cooperation of our colleagues in the legislature, not only that our proposed national budget be approved in your usual timely manner, but it be adhered to as closely as possible," sinabi ni Marcos.

Tiniyak ng Pangulo na ang 2025 NEP ay ginawa "with utmost care, diligence, and meticulous attention."

Nakatakdang isumite ng Department of Budget and Management (DBM) ang 2025 NEP sa Kongreso sa Hulyo 29.

Ang 2025 national budget ay nasa P6.35-trillion, na 10.1% na mas mataas kaysa sa budget ng bansa ngayong taon.

"We expect all agencies to ensure that every centavo allocated will be judiciously spent for our urgent priorities and socially impactful programs," ayon sa Pangulo.

Ang 2025 NEP ay dadaan sa ilang buwan ng pagsusuri at rebisyon ng mga mambabatas, una sa mga kongresista at pagkatapos sa mga senador.

Ang spending plan ay magiging basehan ng General Appropriations Bill ng Kongreso, na isusumite sa Pangulo para aprubahan, kadalasan ay bago matapos ang fiscal year.