Ideklara ang mga kaanak at miyembro ng pamilya na sasabak sa 2025 national at local elections.

Mahigpit na direktiba ito ni Philippine National Police (PNP) Chief General Rommel Francisco Marbil sa mga opisyal at tauhan at inobliga na ipaalam sa Directorate for Personnel and Records Management (DPRM) kung may mga kamag-anak at miyembro ng pamilya na tatakbo sa May 2025 elections.

Inatasan rin ni Marbil ang mga police escort na bumalik sa mga lehitimong unit sa lalong madaling panahon.

Ayon kay PNP Spokesperson Colonel Jean Fajardo, ang utos ni Marbil ay bilang proteksyon sa mga pulis mula sa partisan politics kaya inoobliga ang mga ito na ideklara kahit pa walang kaanak na sasabak sa susunod na eleksyon.

“Obligado ang mga miyembro ng PNP na ideklara kung mayroon o wala silang kamag-anak na tumatakbo sa anumang posisyon sa pulitika sa darating na Mayo 2025 bilang bahagi ng ating SOP o Standard Operational Procedure,” pahayag ni Fajardo.

Natukoy ng PNP ang mga pulis na may mga kamag-anak na tatakbo sa halalan sa susunod na taon lalo na sa local level kaya sinabihan na ililipat ng assignment.

“Doon sa mga pulis natin na may mga kamag-anak po, mga relatives o mga kakilala na tatakbo doon sa kanilang place of assignment ay iliipat po yan at ngayon ay nag-iimbentaryo na po yung ating Directorate for Personnel and Records Management (DPRM) at pinapa-declare na rin kung sino yung may mga kamag-anak,” paliwanag ni Fajardo.

Sakop ng recall order, ayon kay Fajardo, ang mga police escort na nakatalaga sa mga pulitiko at pribadong indibidwal na tatakbo sa halalan sa susunod na taon.

“This early, nag-warning na ang ating chief PNP na hindi po natin pahihintulutan na magkaroon po at magagamit po ang ating pagiging pulis para ma-impluwensyahan itong darating na election sa darating na May 2025,” pahayag pa ng PNP PIO Chief.

Muling binigyang-diin ni Marbil ang responsibilidad ng PNP na itaguyod ang batas at kaayusan ng walang anumang pagkiling o partisan sa pulitika.