Sinampahan ng kasong illegal detention at grave coercion ng mga empleyado ng Makati City Hall si Mayor Lani Cayetano at iba pang opisyal ng lungsod at empleyado nito sa piskalya ng Taguig City makaraang ikulong sila sa nabanggit na parke.

Tatlong kaso ng illegal detention o paglabag sa Art. 267 Revised Penal Code, at isa para sa grave coercion na paglabag sa Art. 286 ng RPC ang isinampa kay Cayetano.

Kasama rin sa kinasuhan sina Taguig City Administrator Jose Luis Montales, Taguig City Business Permits and Licensing Office chief Maria Theresa Veloso, Traffic Management Office head Danny Cañaveral, at iba pa na nagpakilalang mga empleyado ng Taguig City.

Nagsumite ng sinumpaang salaysay ang mga nagreklamong empleyado ng Makati na sila ay ikinulong sa Makati Park and Garden batay sa utos ni Mayor Lani.

Ang kaso ay base na rin sa magkakahiwalay na insidente na may petsang 1, 2, at 3 Marso sa Makati Park.

Ang ikaapat na reklamo na grave coercion ay isinampa dahil hindi pinayagan ng mga tauhan ng Taguig na makapasok sa Makati Aqua Sports Arena (MASA), malapit sa parke ang mga empleyado.

Napag-alaman sa reklamo na kinadena at kinandado ang mga gate ng parke at sinabihan ang mga nasa loob na huwag tangkain na lumabas at pumasok sa nabanggit na pasilidad.