Patuloy na tinatamasa ng Philippine media ang "freest press" sa Asya.

Mensahe ito ni Presidential Task Force on Media Security (PTFoMS) Executive Director Undersecretary Paul Gutierrez sa pagdiriwang ng World Press Freedom Day.

Sa pahayag, isiniwalat ni Gutierrez na buhay ang malayang pamamahayag sa bansa na mayroong 1,300 mainstream media outlets.

Tinukoy ni Gutierrez ang July 2023 data ng Philippine Information Agency (PIA) na sa kasalukuyan ay may 753 radio stations (53%), 421 newspapers (30%) 162 television at cable stations (12%), at 73 magazines (5%) sa bansa.

Bukod pa ito sa mahigit sa isang libong media companies na namamahagi ng creative at entertainment contents sa social media platforms.

Inamin ni Gutierrez na nahihirapan ang gobyerno na imonitor ang bilang ng mga media outlets na nag-operate sa kaharian ng social media dahil sa "liberal" attitude sa internet.

"These numbers debunked unsubstantiated claims that the press is under threat, being curtailed, or being suppressed in the country," deklarasyon ng opisyal.

Tiniyak ng PTFoMS na patuloy ang pagsisikap ng pamahalaan na protektahan ang mga journalists o mamamahayag sa pamamagitan ng pagtugon sa "culture of impunity."

Ayon kay Gutierrez, ang limang insidente ng media violence na nag-iwan ng apat na nasawi habang ang isa naman ay sugatan simula ng maluklok sa Malacañang si Pangulong Ferdinand Marcos Jr. noong July 2022 ay itinuturing “case solved” matapos ang "identification, arrest, at ongoing court trials" ng mga suspek.

Maliban dito, ipinatupad ng task force ang Media Information and Literacy (MIL) campaign ng Presidential Communications Office (PCO) sa ilalim ng pamamahala ni Secretary Cheloy Garafil, ang PTFoMS Co-Chair.

"This campaign involves not only addressing the issue of misinformation, disinformation, and fake news but also developing a culture of responsibility and professionalism among Philippine media practitioners, especially in the regions outside Metro Manila," ayon sa PTFoMS.

Ibinida ni Gutierrez na limang regional media summits ang matagumpay na naidaos noong 2023, habang apat pa ang inihahanda ngayong taon para gawing masiguro na "internationally recognized" bilang best practices sa journalism at personal security awareness ang Philippine media.

Tiniyak ni Gutierrez na patuloy ang government efforts para turuan at itaas ang kamalayan ng media workers habang pinalalakas ang umiiral na mekanismo sa pagtugon sa hinaing ng media upang itaas ang kumpiyansa at sanayin sa propesyon na ligtas at "responsive environment."

“To create a media environment that is free from fear is among the key priorities of the Marcos administration during its entire term,” paglalahad ni Gutierrez.