Tinuligsa ng isang opisyal ng Lungsod ng Makati ang hindi makatwirang pagtanggi ng Lungsod ng Taguig sa mga iminungkahing kasunduan ng pamahalaang lungsod, na aniya’y nakahahadlang sa maayos na paglilipat ng mga pasilidad at serbisyong pangkalusugan sa mga barangay na apektado ng desisyon ng Korte Suprema.

Ayon kay City Administrator Claro Certeza, nagpadala ang Makati sa Taguig ng mga panukalang MOA na layong mapadali ang maayos na paglilipat ng health facilities na pagmamay-ari ng Makati sa hurisdiksyon ng Taguig, kabilang ang walong barangay health centers at ang Ospital ng Makati.

Aniya, sa panukalang MOA tungkol sa Ospital ng Makati na ipinadala ni Mayor Abby Binay kay Mayor Lani Cayetano, nag-alok ito ng credit line sa Taguig upang matiyak ang patuloy na access ng mga apektadong residente sa mga serbisyo ng ospital na pag-aari at nasa pangangasiwa ng Makati.

Sa naturang MOA, magsisilbing “financial safety net” ang credit line para sa Taguig upang patuloy nitong maibigay ang essential health care services sa mga residente kahit hindi kaagad ito makapagbayad sa ospital, lalo na para sa mga kapus-palad na pasyente.

Sinabi ni Certeza na handa ang Makati na maglaan ng milyon-milyong pondo para sa naturang credit line sa Taguig upang maiwasang maputol ang mga serbisyong medikal, ngunit hindi man lang ito binigyang-pansin ni Cayetano. Sa halip, iginiit niyang dapat sundin ng dalawang lungsod ang diumano’y direktiba ni Health Secretary Teodoro Herbosa na siya ang mamumuno sa anumang pag-uusap tungkol sa Ospital ng Makati.

Sa isa pang ipinadalang panukalang MOA ni Mayora Abby, inalok ang Taguig ng opsyon na upahan o bilhin ang lupain at improvement ng walong barangay health centers, sa halagang naaayon sa pagtataya ng Commission on Audit o COA. Subalit tinanggihan din ni Cayetano ang alok, at muling tinukoy ang Kalihim ng Department of Health na diumano’y ipinag-utos na i-exclude ang isyu ng ownership sa transition process.

Ayon kay Certeza, tinanggihan din ng Taguig ang panukalang data sharing agreement na inaalok ng Makati, na layong ma-protektahan ang privacy at sensitibong datos ng mga dati at kasalukuyang pasyente ng health centers ng Cembo, Comembo, East Rembo, Pembo, Pitogo, Rizal, South Cembo at West Rembo.

Aniya, sa kabila ng pagsusumikap ng Makati na magkaroon ng maayos na transition, tila pursigido ang Taguig na angkinin ang public facilities na pagmamay-ari ng Makati nang walang due process. Sa halip, patuloy nitong sinasangkalan ang desisyon ng Korte Suprema habang isinasantabi ang pagkuha ng kaukulang writ of execution mula sa Court of Origin.

Ayon sa Rules of Court, kinakailangang mag-file ang winning party ng motion for execution sa court of origin o sa appellate court upang maipatupad ang judgment o hatol ng korte. Nakapaloob sa writ of execution ang dispositive portion ng judgment, at ito ang dokumentong ipiprisinta ng sheriff sa losing party upang ma-execute o maipatupad ang judgment.

Kamakailan, naging paksa ang Makati-Taguig case sa isang roundtable discussion na isinagawa ng Universidad de Manila College of Law, na dinaluhan ng ilang batikang law professors.

Ayon kay Atty. Vien Lawrence Gabato, isa sa panelists, ang kaso ay napakahalagang bahagi ng jurisprudence ukol sa boundary disputes sa pagitan ng local government units. Binigyang-diin niya na kailangan ang writ of execution sa lahat ng kaso, at aniya’y maaaring ituring na “implied indirect contempt” sa parte ng court of origin o ng Regional Trial Court ng Pasig ang hindi pagpapalabas ng writ of execution.

Sinabi rin ni Gabato na maaaring nakapagdulot na ng wastage of government resources ang kawalan ng writ of execution, at magiging dahilan pa ng kaguluhan at kalituhan sa mga apektadong residente at mga kawani ng dalawang pamahalaang lungsod.

Sumang-ayon naman si Atty. George Matthew Habacon ng University of Asia and the Pacific na kailangan talaga ang writ of execution, na una nang kinumpirma ni Supreme Court administrator Raul Villanueva.

Diin pa ni Habacon, kahit na mapasailalim sa hurisdiksyon ng Taguig ang properties na pagmamay-ari ng Makati, mananatili silang pagmamay-ari ng Makati. Pinakamainam aniya na maisaayos sa isang writ of execution ang mga kaugnay na usapin, tulad ng pag-turn over ng contracts of service.