Sinabi ng operator ng Light Rail Transit-Line 1 (LRT-1) na magsasagawa ito ng retraining sa mga customer service personnel nito pagkatapos manawagan ang isang pasahero kung paano maghandle ng sitwasyon ang mga tauhan nito.

Ibinahagi ng LRT-1 passenger na si Mhina C. Fabre ang kaniyang naging experience sa pagsakay sa LRT-1 Monumento station noong Agosto 23, Miyerkules, sa kasagsagan ng morning rush hour.

Ito rin ang araw na maraming sumasakay na pasahero sa nasabing tren.

Ikinuwento ni Fabre na bandang alas-7:45 ng umaga nang makita niya na naipit ang daliri ng isang lalaking pasahero sa pintuan ng tren. Paulit-ulit daw na kinakatok ng lalaki ang pintuan ng tren baka sakaling may magbukas nito.

Ani Fabre, may isang pasahero ang nagsabing pindutin ang emergency button na nasa loob ng tren upang matulungan na mabuksan ang pintuan at maialis ang naipit na daliri ng lalaking pasahero.

Isang pasahero naman ang umanong tumulong para mabuksan ang pintuan subalit nilapitan sila ng security guard at iniutos na lumabas ang pasaherong pumindot sa emergency button.

Kuwento pa ni Fabre na hindi pinakinggan ng security ang kanilang explanations.

“Actions take 3-5 [minutes] before tuluyan magsara ‘yung door. The sad part is, they don’t even bother to ask kung ‘Kamusta ‘yung naipit na daliri ng pasahero? If he needs assistance [or] medics? Lastly, kung ok lang ba [siya]?'”saad sa post ni Fabre.

“[Si] kuyang nagmalasakit? AYUN. Pinababa at kukunan [daw] ng Incident Report. ‘NAGMALASAKIT NA, NA ABALA PA!’ So LRT, PARA [SAAN] NGA BA ANG PAGGAMIT NG EMERGENCY BUTTON????????” dagdag pa nito.

Humingi naman ng paumanhin ang Light Rail Manila Corporation (LRMC), ang operator ng transit line, at tiniyak sa riding public na “reiterate and refresh the customer service training” ng mga kawani nito upang maiwasan ang mga katulad na insidente.

Sinabi nito na nangyari ang insidente sa isang Gen-1 o unang henerasyong uri ng tren na, ibig sabihin hindi idinisenyo para sa mga automatic door sensors.

“Based on initial incident review, the affected male passenger boarded the train and held on to the door, causing his fingers to be caught between the closing doors,” pahayag ng LRMC noong Setyembre 4, mahigit sampung araw pagkatapos ng insidente .

“The male passenger was immediately assisted by the platform security personnel. He was offered to be brought to the LRMC Clinic at Central Station, but he declined and availed of the first-aid treatment at Monumento Station for his minor right thumb injury,” dagdag ng operator.

Sinabi ng LRMC na nagdulot ng hindi pagkakaunawaan sa pagitan ng mga pasahero at mga tauhan ng LRMC ang morning rush hour.

Dagdag pa ng operator, isinasagawa pa nila ang masusing imbestigasyon sa insidente.

Gayunpaman, tiniyak nito sa mga commuter na “not tolerate disrespectful behavior in the team” and it strives “to find solutions to keep improving our services everyday.”

Hinikayat din nito ang publiko na tulungan itong isulong at panatilihin ang isang ligtas na sistema ng pampublikong transportasyon sa pamamagitan ng wastong pag-uugali ng pasahero at pagsunod sa mga alituntunin sa kaligtasan.