Mahigit 12 oras nang nananatili sa itaas ng poste ng kuryente ang isang lalaki sa Barangay Calumpang, Marikina City.

Ang lalaki ay naka-shorts at walang suot na pang itaas.

Ayon sa ilang residente, umaga ng Martes ay nasa puno lamang ito at nang pababain ng mga taga barangay ay lumipat ito sa poste ng kuryente.

Hindi pa nakuntento ang lalaki at umakyat pa sa pinaka-tuktok na bahagi ng poste.

Ayon sa Bureau of Fire Protection (BFP), nasa labing limang palapag ng gusali ang taas ng poste.

Gumamit na ng ladder at boom ang mga tauhan ng BFP para maabot ang lalaki.

Pahirapan umano ang pagsagip sa lalaki lalo’t kinakailangang may maikabit na harness dito para ligtas na maibaba.

Tanging sigarilyo lamang ang demand ng lalaki at nabigyan naman ito ng BFP ng pagkain at tubig.

Sa ngayon, wala pa ring suplay ng kuryente ang paligid ng barangay dahil sa insidente.