Muling nagdeklara ang Malacañang ng suspensyon ng klase sa lahat ng antas sa Metro Manila at 35 lalawigan ngayong Huwebes, Hulyo 24, dahil sa patuloy na masamang panahon.

Saklaw ng suspensyon ang Metro Manila, Zambales, Pangasinan, La Union, Ilocos Norte, Ilocos Sur, Abra, Benguet, Tarlac, Pampanga, Bataan, Bulacan, Cavite, Batangas, Occidental Mindoro, Apayao, Kalinga, Mountain Province, Ifugao, Nueva Vizcaya, Nueva Ecija, Rizal, Laguna, Quezon, Marinduque, Oriental Mindoro, Romblon, Palawan, Cagayan, Camarines Sur, Catanduanes, Albay, Sorsogon, Masbate, Antique, at Iloilo.

Nakasaad sa Memorandum Circular No. 91, na nilagdaan ni Executive Secretary Lucas Bersamin noong July 23, na ang suspensyon ay alinsunod sa rekomendasyon ng National Disaster Risk Reduction and Management Council (NDRRMC).

Ang mga ahensya ng mga nasabing lugar na responsable sa pangunahin, mahalaga at health services, paghahanda at mga tungkulin sa pagtugon ay dapat na magpatuloy para manatiling operational upang matiyak na nagpapatuloy ang mahalagang government functions.

Ang non-vital government employees na saklaw ng ahensya at lahat ng iba pang government employees sa parehong mga lugar ay "not required to physically report to work."

"However, where practicable and as determined by the respective heads of agencies, the said government employees shall be on alternate work arrangement, subject to applicable laws, rules and regulations," nakasaad sa MC 91.

Ang localized cancellation o suspensyon ng klase at/o trabaho sa government offices sa ibang rehiyon ay maaaring ipatupad ng kani-kanilang Local Chief Executives, alinsunod sa kaugnay na batas, rules and regulations.

Ang suspensyon at/o adapsyon ng alternatibong work arrangements sa pribadong kumpanya at tanggapan ay ipinauubaya ng Malakanyang sa diskresyon ng kani-kanilang pinuno.