Patuloy na sinisikap ng Department of Education (DepEd) na palakasin at paghusayin ang pagpapatupad ng Catch-Up Fridays program nito.

Ayon kay DepEd Undersecretary at Spokesperson Michael Poa, ang Catch-Up Fridays ay bahagi ng 'learning recovery efforts' ng ahensya.

“Ito ay every Friday na tututok lang sa pagbabasa sa ating mga kabataan kasama na din yung health, values education, peace education," pahayag ni Poa sa isang panayam.

Ang Catch-Up Fridays, na inilunsad noong Enero, ay isang “learning mechanism" na nais palakasin ang "foundational, social, at iba pang relevant skills" na kinakailangan para maisakatuparan ang mga layunin ng basic education curriculum.

Isiniwalat ni Poa na simula ng ipatupad ang programa ay nakatanggap na ang DepEd ng mga komento hinggil sa Catch-Up Fridays.

“Sa ngayon na gusto pa namin paigtingin due to the comments na nakukuha natin from the field,” paglalahad ni Poa.

Matatandaang hiningan ng DepEd ng komento ang publiko at field offices ukol sa implementasyon ng Catch-Up Fridays at kasalukuyang pinagsasama-sama ang feedback.

Batay sa mga komentong nakalap, sinabi ni Poa na ang programa ay labis na nakatulong sa mga kabataan pagdating sa pagpapabuti ng kanilang reading skills. “Meron tayong mga testimonials ng mga bata na natutong magbasa,” dagdag nito.

Para maging “uniform” ang implementasyon, sinabi ni Poa na ginagawa ng DepEd Curriculum Strand ang mga iniulat na isyu at alalahanin.

“When we implement it in the next school year, 2024-2025, gusto na natin maayos yung mga ganyang hinaing,” ayon sa opisyal.

Bilang bahagi ng pagsisikap na tugunan ang mga alalahanin na may kaugnayan sa Catch-Up Fridays, sinabi ni Poa na ang DepEd ay nagsimula na mamigay ng resources sa mga eskuwelahan tulad ng reading materials na magagamit ng mga estudyante.

Sinabi ni Poa na ang Curriculum Strand ay maglalabas ng Lesson Exemplars o Lesson Guides para sa mga guro para tulungan silang magplano ng kanilang aralin at “standardize” ang programa.

Ang programa ay nakalinya sa MATATAG Agenda na inilunsad noong Enero upang itakda ang bagong direksyon para sa DepEd at stakeholders sa paglaban sa mga hamon sa basic education.

Upang matugunan ang mga hamon sa kalidad ng edukasyon, inilunsad ng DepEd noong August 2023 ang “MATATAG Curriculum” para sa Kindergarten hanggang Grade 10.

Ayon kay Poa, nakatuon ang MATATAG Curriculum sa mga basic competencies tulad ng 'reading and comprehension,' at iba pa.

“Binawasan talaga natin yung napakaraming learning competencies --- from around 11,000 to 3,800 for K to 10,” aniya. “Ibig sabihin nun, mag-focus na tayo sa talagang essential foundational areas."