AirAsia, nakalusot sa utang na P270M; passenger traffic, bumaba

Inabot ng matinding singilan at pinatawan pa ng cease-and-desist order ang AirAsia Philippines, na halos maging mitsa ng pagtigil ng operasyon nito, bago tuluyang naareglo sa mga awtoridad ang mahigit P270 milyong utang ng airline.

Kinumpirma ng Civil Aviation Authority of the Philippines (CAAP) ngayong Huwebes, Hunyo 4, na nakapagbayad na ng utang ang AirAsia Philippines, ilang araw matapos itong patawan ng cease-and-desist order para ipatigil ang kanilang operasyon.

Umabot sa P271.94 milyon ang utang ng AirAsia Philippines sa air navigation, landing, parking at passenger service charges mula 2021 hanggang Mayo 2026. Bukod pa rito ang interes at mga penalty.

Ayon kay CAAP Director-General Raul Del Rosario, hindi nakapagbayad ang AirAsia sa kabila ng kanilang ilang ulit na paniningil sa kumpanya.

Dahil dito, ipinag-utos ng CAAP noong Hunyo 2 na ipatigil ang operasyon ng airline at huwag itong pagamitin ng airport facilities hangga't walang abiso ng ahensya. Binigyan din ng hanggang Hunyo 6 na palugit ang AirAsia para bayaran ang mga obligasyon nito.

Itinanggi naman ng AirAsia kamakailan na titigil ang kanilang operasyon at siniguro sa kanilang mga pasahero na tuloy-tuloy ang kanilang serbisyo.

Samantala, sa datos ng Fights in Asia, hindi pa nakakabawi ang AirAsia sa 7.83 milyong domestic at international passenger traffic nito na naitala noon pang 2019. Bumaba ang passenger traffic ng AirAsia sa 6.3 milyon noong 2024 at 5.2 milyon noong 2025.