Iniulat ngayon ni House medical director Dr. Jose Luis Bautista na nakalabas na ng hospital si Cassandra Li Ong, ang 24-anyos na pinaniniwalaang dummy ng ilegal na Philippine Offshore Gaming Operators (POGO).

Personal na ipinaalam ni Dr. Bautista kay House Speaker at Leyte 1st District Representative Ferdinand Martin Romualdez ang isyu at inilahad na kaya na ulit ng kalusugan ni Ong na dumalo sa pagdinig ng Quad Committee.

“Our in-house medical personnel can be fully prepared to handle any other medical condition she might have as she continues to appear in the Quad Comm hearings,” pahayag ni Bautista.

Matatandaan na si Ong ay isinugod sa pagamutan noong nakalipas na linggo matapos na mahilo dulot ng biglang pagbaba ng blood sugar at blood pressure.

Sa naunang pagdinig ng Quad Committee, itinanggi ni Ong na dummy siya ng POGO, at dahil dito ay inakusahan siya ng mga solon na nagsisinungaling at binantaan na ikukulong sa Womens Correctional sa Mandaluyong City kapag ipinagpatuloy ang pagsisinungaling.

Nananatiling nasa kustodiya ng Kamara si Ong mula ng arestuhin kasama ni Shiela Guo sa Batam Island sa Indonesia at idineport pabalik ng Pilipinas tatlong linggo na ang nakakalipas.

Kaugnay nito, ipinaalam sa Kamara ni Atty. Ferdinand Topacio, abogado ni Ong, sa pamamagitan ng liham na mas gugustuhin ng kliyente na ikulong sa regular na piitan kesa dumalo sa pagdinig ng Quad Comm.

Si Ong ay kinatawan ng Lucky South 99, ang dating licensed POGO hub sa Porac, Pampanga na sinalakay ng mga awtoridad dahil sa illegal activities, tulad ng torture, bagay na tahasang itinanggi ng dalaga.