Idineklara ng Canlaon City sa Negros Oriental ang state of calamity noong Martes ng hapon, Hunyo 4, wala pang 24 na oras kasunod ng pagputok ng Bulkang Kanlaon noong Lunes ng gabi, Hunyo 3.

Pinagtibay ang rekomendasyon ng Local Disaster Risk Reduction and Management Council (LDRRMC) para sa state of calamity dahil naapektuhan ng pagsabog ang ilang residente sa lungsod at mga karatig lugar.

“Bilang isang agricultural city, ang nasabing natural calamity ay lubhang nakakaapekto sa economic living condition ng mga tao, partikular na ang mga magsasaka, kaya kailangan ng lokal na pamahalaan na gumawa ng mga kinakailangang hakbang upang matugunan at masugpo ang epekto ng pagsabog ng bulkan,” ang sabi ng konseho ng lungsod sa isang resolusyon.

Sa press conference nitong Martes, sinabi ni Mayor Jose Chubasco Cardenas na maghihintay pa sila ng karagdagang abiso kung hanggang kailan isasailalim ang lungsod sa state of calamity.

Mahigit 23,000 indibidwal ang naapektuhan ng pagsabog ng bulkan mula sa mga bayan ng Masulog, Pula, Linuthangan, Malaiba at Lumapao.

Nanawagan din ang alkalde ng mga hygiene kits para sa mga bakwit.

Bagama’t sinabi ni Cardenas na normal na ang sitwasyon sa lungsod habang humihina ang aktibidad ng bulkan.

Pero mahigpit aniya na sinusunod ang paghihigpit sa loob ng 4-kilometer Permanent Danger Zone.

Hinimok niya ang Department of Trade and Industry (DTI) na magpataw ng price freeze sa mga bilihin upang maiwasang mapakinabangan ng mga negosyo ang sitwasyon habang nasa ilalim ng state of calamity ang lungsod.