Muling kinilala ang isla ng Boracay bilang isa sa mga paboritong isla sa buong mundo para sa taong ito, ayon sa survey ng travel website na nakabase sa United States na Travel+Leisure.

Nakuha ng Boracay ang ika-10 spot mula sa 25 isla sa buong mundo ngayong taon na may puntos na 92.94.

Kilala sa buong mundo ang isla sa white sand at maraming water activities.

Karamihan sa mga bumibisita sa isla ay namamangha sa angking ganda nito. Anila, ang Boracay ay “the best leisure vacation destination.”

Samantala, nangunguna sa listahan ng mga paboritong isla sa mundo ay ang Great Barrier Reef Islands sa Australia.

Kasama rin ang Maldives, Bali sa Indonesia, Madeira sa Portugal, Phuket sa Thailand, Skye and the Hebrides sa Scotland, Koh Samui sa Thailand, Dominica, Langkawi sa Malaysia, Paros sa Greece, Fiji, Golden Isles sa Georgia, Moorea sa French Polynesia , Zanzibar sa Tanzania, Seychelles, Azores sa Portugal, Bora-Bora sa French Polynesia, Rhodes at ang Dodecanes sa Greece, Mackinac Island sa Michigan, Galapagos Island sa Ecuador, Hvar at ang Dalmatian Islands sa Croatia, Sicily sa Italy, Anguilla at Santorini sa Greece.

165,000 readers ang tumugon sa survey ng Travel+Leisure na sumasaklaw sa mga sumusunod na pamantayan: mga natural attractions/beaches, activities/sights, restaurants/food, people/friendliness at value.

Noong nakaraang taon, pinarangalan din ng parehong website ang Boracay bilang 9th best island in the world at 4th best island in Asia.