Hindi bababa sa 65 probinsya ang makararanas ng matinding tagtuyot mula Pebrero hanggang Mayo sa susunod na taon dahil sa matinding epekto ng El Niño, ayon sa Department of Science and Technology (DoST).

Sinabi ni Science and Technology Secretary Renato Solidum na nasa anim na lalawigan o 7 porsiyento ng kabuuang mga lalawigan sa buong bansa ang maaaring makaranas ng dry spell.

Sa pagtatapos ng buwan ng Mayo, 77 porsiyento o 65 mga lalawigan ay makararanas ng matinding tagtuyot at 7 porsiyentong o anim na probinsya ang makararanas ng dry spell.

Nagbabala din si Solidum na pagdating ng Abril o Mayo maaaring umabot sa 41 degrees centigrade ang pinakamataas na temperatura sa Northern Luzon.

Sa Metro Manila, maaaring umabot sa 38.3 degrees ang temperatura, habang sa lowland Luzon, maaari itong umabot sa 39.9 degrees. Maaaring uminit ang Mindanao sa Abril sa 39.5 degrees.

Ani Solidum dapat maghanda ang bansa para sa isang matinding El Niño.

Nauna nang nagbabala ang Philippine Atmospheric, Geophysical and Astronomical Services Administration (PAGASA) na posibleng magsisimulang makaranas ng tagtuyot ang mga lalawigan ng Batangas, Cavite at Oriental Mindoro sa Disyembre ngayong taon.

Sinabi ni PAGASA officer in charge Nathaniel Servando na mararanasan ang severe dry effect sa Abra, Ilocos Norte, Bataan, Zambales, Occidental Mindoro at Metro Manila.

Noong sectoral meeting sa Malacañang noong Martes, sinabi ni Solidum na ipinag-utos ni Pangulong Ferdinand Marcos Jr. na planuhing mabuti ang gagawin ng gobyerno para mapaghandaan ang magiging epekto ng El Niño sa agrikultura, kalusugan, seguridad, edukasyon, tubig at enerhiya.